મેળામાંથી પરત ફરતી અને જતી વખતે સર્જાયેલી દુર્ઘટનામાં નવપરિણિત બે આશાસ્પદ યુવાનોએ જીવ ગુમાવ્યા : સારવાર માટે ભુજ ખસેડાયેલા ઈજાગ્રસ્તની હાલત નાજુક

માંડવી - કચ્છઉદય : માંડવી-ગઢશીશા માર્ગ પર કોલીયાણ પાટિયા પાસે સોમવારે વાહન અકસ્માત સર્જાયો હતો, જેમાં બે દ્વિચક્રી વાહનો સામસામે પ્રચંડ વેગથી અથડાતાં બે આશાસ્પદ યુવાનોના અકાળે મોત નિપજ્યાં છે. આ દુર્ઘટનામાં અન્ય એક યુવક ગંભીર રીતે ઘવાયો હતો.
ઘટનાની વિગતો અનુસાર માંડવી નજીક આવેલા ભુઠ્ઠીપીરના મેળામાં જઈ રહેલા અને કડિયાકામનો વ્યવસાય કરતા અનિલ રવજી મહેશ્વરી (ઉંમર વર્ષ ૨૭) તથા તેમના માસીના પુત્ર રોહન પ્રેમજી મુછડિયા પોતાના મોટરસાઇકલ ક્રમાંક જીજે ૧૨ એચકે ૬૪૭૨ પર સવાર હતા. તે જ સમયે સામેથી પોતાની બાઈક ક્રમાંક જીજે ૧૨ એચડી ૯૭૦૮ લઈને ઘર તરફ પરત ફરી રહેલા વિશાલ જેન્તી પટ્ટણી (ઉંમર વર્ષ ૨૪) નામના યુવકના વાહન સાથે કોલીયાણ પાટિયા પાસે અચાનક ધડાકાભેર ટક્કર થઈ હતી. આ ગોઝારા બનાવમાં વિશાલનું ઘટનાસ્થળે જ પ્રાણપંખેરૂં ઊડી ગયું હતું. 
જ્યારે ગંભીર રીતે ઘવાયેલા અનિલ મહેશ્વરીને તાત્કાલિક સારવાર અર્થે માંડવીની હોસ્પિટલમાં ખસેડવામાં આવ્યા હતા, જ્યાં ટૂંકી સારવાર દરમિયાન તેમણે પણ અંતિમ શ્વાસ લીધા હતા. અકસ્માતમાં ઈજાગ્રસ્ત બનેલા ત્રીજા યુવક રોહન મુછડિયાની સ્થિતિ નાજુક હોવાથી તેમને વધુ સઘન સારવાર માટે ભુજની હોસ્પિટલમાં દાખલ કરવામાં આવ્યા છે. દુઃખદ બાબત એ છે કે અકાળે કાળનો કોળિયો બનેલા બંને હતભાગી યુવાનોના લગ્ન હજુ થોડા મહિનાઓ પૂર્વે જ થયા હતા. આ તકે સ્થાનિકો અને પરિવારે આક્રોશ વ્યક્ત કરતા જણાવ્યું હતું કે માંડવીની સિવિલ હોસ્પિટલમાં ઓર્થોપેડિક તબીબની સેવાઓ ઉપલબ્ધ ન હોવાને કારણે ઈમરજન્સી સમયે દર્દીઓને ભુજ સુધી લંબાવવું પડે છે. જેથી આવી ઈમરજન્સી સ્થિતિને પહોંચી વળવા માટે હોસ્પિટલમાં તાત્કાલિક ધોરણે હાડકાના નિષ્ણાત તબીબની નિમણૂક કરવામાં આવે તેવી પ્રબળ માંગણી કરવામાં આવી છે.