ફતેહગઢ વિસ્તારમાં સામસામે ફાયરિંગ થતાં દોડધામ : એકને ઈજા થતાં ગાંધીધામની ખાનગી હોસ્પિટલમાં ખસેડાયા : પોલીસની ટુકડીઓ ઘટનાસ્થળે પહોંચી, સ્થિતિ કાબૂમાં લીધી

 ગાંધીધામ - કચ્છ ઉદય : વાગડ પંથકના રાપર તાલુકાના ફતેહગઢ ગામે આજે દિનદહાડે ધાણીફૂટ સામસામે થયેલા ફાયરિંગની ઘટનાથી ભારે અફરાતફરી અને ભયનો માહોલ સર્જાયો છે. ભરચક વિસ્તારમાં અચાનક બંદૂકની ગોળીઓ છૂટતાં જ લોકોમાં દોડધામ મચી ગઈ હતી. આ હિંસક અથડામણમાં એક વ્યક્તિને ગોળી વાગતાં ગંભીર ઈજા પહોંચી હતી, જેમને તાત્કાલિક સારવાર અર્થે ગાંધીધામની ખાનગી હોસ્પિટલમાં ખસેડવામાં આવ્યા છે.
ઘટનાની જાણ થતાં જ પોલીસનો કાફલો અને ઉચ્ચ અધિકારીઓની ટુકડીઓ ઘટનાસ્થળે દોડી ગઈ હતી. પોલીસે સમગ્ર વિસ્તારમાં નાકેબંધી કરી 
પરિસ્થિતિ પર કાબૂ મેળવ્યો છે અને શાંતિ જાળવવા કડક બંદોબસ્ત ગોઠવી દીધો છે.
દિનદહાડે થયેલા આ ફાયરિંગના બનાવથી રાપર સહિત સમગ્ર વાગડ પંથકમાં એકચોટ હલચલ મચી જવા પામી છે. આ ફાયરિંગ કયા જૂના મનદુઃખ કે વેરઝેરના કારણોસર થયું છે તેમજ બંને પક્ષે કેટલા લોકો આ સામસામે ફાયરિંગમાં સંકળાયેલા હતા, તે અંગેની સત્તાવાર માહિતી હજુ અકબંધ છે. પોલીસ દ્વારા ઈજાગ્રસ્તનું નિવેદન નોંધવા સાથે આસપાસના લોકોની પૂછપરછ હાથ ધરીને આગળની કાયદેસરની તપાસનો ધમધમાટ શરૂ કરવામાં આવ્યો છે.