સંશોધન પ્રસ્તાવ અને અહેવાલ લેખન અંગે ૧૨૦ જેટલા સહભાગીઓને માર્ગદર્શન અપાયું

ભુજ - કચ્છઉદય : ભુજની આર. આર. લાલન કોલેજ ખાતે સંશોધન અને વિકાસ સેલ તથા આંતરિક ગુણવત્તા ખાતરી સેલના સંયુક્ત ઉપક્રમે નોલેજ કન્સોર્ટિયમ ઑફ ગુજરાતના પ્રાયોજન હેઠળ સંશોધન પદ્ધતિશાસ્ત્ર વિષયક એક દિવસીય રાજ્યકક્ષાનો સેમિનાર યોજાયો હતો. તેમાં સંશોધકો, અધ્યાપકો, અંતિમ વર્ષના વિદ્યાર્થીઓ અને પીએચ.ડી.ના સંશોધનાર્થીઓ સહિત આશરે ૧૨૦ લોકોએ ભાગ લીધો હતો.
કોલેજના આચાર્ય ડૉ. સી. એસ. છાલાએ સહભાગીઓને આવકારતાં ઉચ્ચ શિક્ષણમાં સંશોધન અને વૈજ્ઞાનિક અભિગમનું મહત્ત્વ સમજાવ્યું હતું. મુખ્ય અતિથિ તરીકે ઉપસ્થિત ગુજરાત ઇન્સ્ટિટ્યૂટ ઑફ ડેઝર્ટ ઇકોલોજીના નિયામક ડૉ. વી. વિજયકુમારે પોતાની સંશોધનયાત્રાના અનુભવો રજૂ કરી યુવા સંશોધકોને ઉપલબ્ધ તકો અંગે માર્ગદર્શન આપ્યું હતું. જિલ્લા આંકડાશાસ્ત્ર અધિકારી રાજેશ જારુએ જ્ઞાનના સર્જન અને શૈક્ષણિક પ્રગતિમાં સંશોધનનું મહત્ત્વ સમજાવ્યું હતું.
સેમિનારમાં ત્રણ જ્ઞાનવર્ધક સત્રો યોજાયાં હતાં. કચ્છ યુનિવર્સિટીના વ્યવસ્થાપન વિભાગના ડૉ. કનિષ્ક શાહે સંશોધનના પાયાના સિદ્ધાંતો, સંશોધન નૈતિકતા અને ભારતીય જ્ઞાન પરંપરા અંગે સમજ આપી હતી. તોલાણી વાણિજ્ય મહાવિદ્યાલયના ડૉ. જગદીશ રાયાણીએ ક્ષેત્રકાર્ય, માહિતી એકત્ર કરવાની પદ્ધતિઓ અને આંકડાકીય વિશ્લેષણ વિશે માર્ગદર્શન આપ્યું હતું. જ્યારે માંડવીની સરકારી વિજ્ઞાન મહાવિદ્યાલયના ડૉ. પૌરવ મહેતાએ સંશોધન પ્રસ્તાવ અને સંશોધનપત્ર તૈયાર કરવાની રીત, લેખનશૈલી તથા તેની રચનાના વિવિધ તબક્કાઓ સમજાવ્યા હતા.
વિદ્યાર્થીઓ અને સંશોધનાર્થીઓ સંશોધનયોગ્ય પ્રશ્નો ઓળખી શકે, યોગ્ય પદ્ધતિ પસંદ કરી શકે તેમજ વિશ્વસનીય માહિતીના આધારે સંશોધન પ્રસ્તાવ અને અહેવાલ તૈયાર કરી શકે તે સેમિનારનો મુખ્ય હેતુ રહ્યો હતો. આ ઉપરાંત આંકડાકીય સાધનોનો યોગ્ય ઉપયોગ અને શૈક્ષણિક લેખનમાં ગુણવત્તા જાળવવા પર પણ ભાર મૂકાયો હતો. કાર્યક્રમના સંયોજક અને સંશોધન તથા વિકાસ સેલના વડા ડૉ. પ્રણવ પંડ્યાએ આયોજન અંગે માહિતી આપી હતી. સેમિનારના સંકલન અને વ્યવસ્થામાં ડૉ. ભાવેશ ભટ્ટ, ડૉ. મનોજ છાયા, ડૉ. રમેશ વર્ચંદ, ડૉ. ગોસ્વામી, બી. કે. વાઘેલા તેમજ વિદ્યાર્થી સ્વયંસેવકોએ સહયોગ આપ્યો હતો. અંતે બી. કે. વાઘેલાએ આભારવિધિ કરી હતી. સેમિનારથી કોલેજમાં સંશોધનલક્ષી શૈક્ષણિક વાતાવરણને પ્રોત્સાહન મળવાની સાથે વિદ્યાર્થીઓ, સંશોધનાર્થીઓ અને અધ્યાપકોને સંશોધન ક્ષેત્રે આગળ વધવા માટે ઉપયોગી માર્ગદર્શન પ્રાપ્ત થયું હતું. 
----