વિશ્વ સ્ટ્રોક દિવસ નિમિત્તે એમએમપીજે અને કે.કે. પટેલ હોસ્પિટલની જનજાગૃતિ અપીલ


ભુજ - કચ્છઉદય : વિશ્વ સ્ટ્રોક દિવસ નિમિત્તે કચ્છી લેવા પટેલ એજ્યુકેશન એન્ડ મેડિકલ ટ્રસ્ટ સંચાલિત માતૃશ્રી મેઘબાઈ પ્રેમજી જેઠા હોસ્પિટલ એન્ડ રિસર્ચ સેન્ટર (લેવા પટેલ હોસ્પિટલ), ભુજ અને કે. કે. પટેલ સુપર સ્પેશિયાલિટી હોસ્પિટલ, ભુજ દ્વારા લોકોને સ્ટ્રોક (લકવો) અંગે જાગૃત રહેવા, તેનાં પ્રારંભિક લક્ષણો ઓળખવા અને વિલંબ કર્યા વિના તાત્કાલિક તબીબી સારવાર મેળવવા ભાવભરી અપીલ કરવામાં આવે છે.
સ્ટ્રોક માત્ર એક તબીબી કટોકટી નથી, પરંતુ દર્દી અને તેના સમગ્ર પરિવારના જીવનને અચાનક અસર કરી શકે તેવી ગંભીર સ્થિતિ છે. એક ક્ષણમાં વ્યક્તિની બોલવાની ક્ષમતા, હાથ-પગની હિલચાલ અને સ્વાવલંબન જોખમમાં મુકાઈ શકે છે. આવા સમયે પરિવારજનોની સતર્કતા અને સમયસર લેવાયેલો નિર્ણય દર્દીનો જીવ બચાવવામાં મહત્ત્વપૂર્ણ સાબિત થઈ શકે છે.
સ્ટ્રોક ત્યારે થાય છે જ્યારે મગજના કોઈ ભાગમાં લોહીનો પુરવઠો અટકી જાય અથવા મગજની રક્તવાહિની ફાટી જાય. આવી સ્થિતિમાં મગજની કોષિકાઓને નુકસાન થઈ શકે છે. તેથી સ્ટ્રોકના કિસ્સામાં દરેક મિનિટ કિંમતી હોય છે. સ્ટ્રોકનાં મુખ્ય લક્ષણોમાં ચહેરાનો એક ભાગ વાંકો થઈ જવો, હાથ કે પગમાં અચાનક નબળાઈ અથવા સુન્નતા આવવી, બોલવામાં કે બીજાની વાત સમજવામાં તકલીફ થવી, અચાનક દૃષ્ટિમાં ફેરફાર થવો, ચાલવામાં સંતુલન ગુમાવવું અથવા અચાનક તીવ્ર માથાનો દુખાવો થવો સામેલ છે. આવાં કોઈપણ લક્ષણો જણાય તો ઘરગથ્થુ ઉપચાર કરવામાં કે લક્ષણો મટી જવાની રાહ જોવામાં સમય બગાડવો નહીં. દર્દીને તાત્કાલિક ઇમરજન્સી સારવાર માટે હોસ્પિટલ પહોંચાડો. લક્ષણો થોડા સમય પછી મટી જાય તો પણ તેને અવગણશો નહીં.
સ્ટ્રોકની સારવારમાં સમયનું વિશેષ મહત્ત્વ છે. દર્દીની સ્થિતિ, સ્ટ્રોકનો પ્રકાર અને અન્ય તબીબી પરિબળોના આધારે નિષ્ણાત તબીબો લોહીની ગાંઠ ઓગાળવાની દવા અથવા રક્તવાહિનીમાંથી ગાંઠ દૂર કરવાની વિશેષ પ્રક્રિયા જેવી સારવાર અંગે નિર્ણય લઈ શકે છે. આવી સારવાર માટે યોગ્ય સમયે હોસ્પિટલ પહોંચવું અત્યંત જરૂરી છે. કચ્છી લેવા પટેલ એજ્યુકેશન એન્ડ મેડિકલ ટ્રસ્ટ સંચાલિત બંને હોસ્પિટલો સમાજના દરેક વર્ગના લોકોને સમયસર, ગુણવત્તાસભર અને માનવતાપૂર્ણ આરોગ્યસેવા પૂરી પાડવા પ્રતિબદ્ધ છે. સ્ટ્રોક જેવી ગંભીર પરિસ્થિતિમાં યોગ્ય તબીબી માર્ગદર્શન અને સમયસર સારવારનું મહત્ત્વ લોકો સુધી પહોંચે તે માટે આ જનજાગૃતિ અપીલ કરવામાં આવી છે. વધુ માહિતી માટે માતૃશ્રી મેઘબાઈ પ્રેમજી જેઠા હોસ્પિટલ એન્ડ રિસર્ચ સેન્ટર (લેવા પટેલ હોસ્પિટલ), ભુજ એપોઇન્ટમેન્ટ : +૯૧ ૯૫૭૪૨ ૩૦૧૩૨ / ઇમરજન્સીઃ +૯૧ ૬૩૫૯૦ ૮૨૪૪૪ અને કે. કે. પટેલ સુપર સ્પેશિયાલિટી હોસ્પિટલ, ભુજ એપોઇન્ટમેન્ટઃ +૯૧ ૯૧૦૪૩ ૧૨૦૨૨/ઇમરજન્સીઃ +૯૧ ૭૩૫૯૦ ૦૭૦૦૦, સ્ટ્રોક ઇમરજન્સી હેલ્પલાઇનઃ ૦૨૮૩૨ ૨૩૬૦૦૧નો સંપર્ક કરવા જણાવાયું છે.
ટ્રસ્ટની જનહિત અપીલ વિશ્વ સ્ટ્રોક દિવસ નિમિત્તે બંને હોસ્પિટલો સમાજના દરેક નાગરિકને અપીલ કરે છે કે સ્ટ્રોકનાં લક્ષણો વિશે જાણકારી મેળવો અને પરિવારજનો, મિત્રો તથા આસપાસના લોકોમાં પણ જાગૃતિ ફેલાવો. તમારી સમયસરની સમજદારી કોઈનો જીવ બચાવી શકે છે અને એક પરિવારને જીવનભરની મુશ્કેલીઓથી બચવાની તક આપી શકે છે.યાદ રાખો સ્ટ્રોકમાં રાહ જોવાનો સમય નથી, તરત પગલાં લેવાનો સમય છે. 
----------