કચ્છ ઉદય

શિણાય પાસે ચોરાઉ ભંગાર વેચવા નીકળેલા બે યુવકને પકડી લેવાયા

02 April , Wednesday

એસપી સાગર બાગમાર દ્વારા જિલ્લામાં મિલકત સંબંધી ગુના અટકાવવા માટે કડક પગલાં ભરવા સૂચના અપાઈ : પોલીસના પેટ્રોલિંગ દરમિયાન શંકા જતા મુદ્દામાલ કબજે કરાયો

ખાટલે મોટી ખોટ : શિણાય પાસે શંકાસ્પદ ભંગારનો જથ્થો પકડાયો છે, તે આવકારદાયક કહેવાય. હવે પોલીસ તંત્ર આ ભંગારનો જથ્થો જતો કયા હતો? બે શખ્સો ઝડપાયા તેઓએ અગાઉ કેટકેટલીવાર આ રીતે ભંગારનો જથ્થો સગેવગે અથવા હેરફેર કર્યો છે? ભંગારનો જથ્થો કયાથી લાવ્યા હતા? અન્ય કોણ કોણ છે સંડોવાયલું..? : આ વિષયો પર પણ તપાસ થવી જરૂરી..!

ગાંધીધામ : પૂર્વ કચ્છમાં મિલકત સંબંધી ગુના અટકાવવા માટે એસપી સાગર બાગમાર દ્વારા સૂચના આપવામાં આવી છે. જે અંતર્ગત આદિપુર પોલીસની ટીમ પેટ્રોલિંગમાં હતી ત્યારે શિણાય-અંજાર રોડ પર ટાટા કંપનીના ટેમ્પોમાં બે ઈસમો પતરાના ટુકડા અને ભંગાર વેચવા નીકળ્યા હોવાની બાતમી મળી હતી. જે આધારે ગાડી નં.જીજે૧ર-એવાય-૪૧૧૯ ને અટકાવી તપાસ કરતા તેમાંથી ર,૯૪૦ કિલો પતરાના ટુકડા અને મિક્ષ ભંગાર મળી આવ્યો હતો. જેના આધાર પુરાવા માંગતા મળી આવ્યા ન હતા. ચોરી કે છળકપટથી માલ મેળવ્યો હોવાનું જણાઈ આવતા આદિપુર પોલીસ દ્વારા મુદ્દામાલ કબજે કરવામાં આવ્યો હતો. અંતરજાળના ગોપાલનગરમાં રહેતા સુરેશ બાબુભાઈ દેવીપુજક અને અંજારના નવાનગરમાં રહેતા સુરેશ વિશનજી પારાધીની આ સાથે અટકાયત કરવામાં આવી હતી. ૪.પ૦ લાખના ટેમ્પો સાથે મુદ્દામાલ કબજે કરી આદિપુર પોલીસમાં જાણવા જોગ દાખલ કરવામાં આવી છે. આ કામગીરીમાં પીઆઈ ડી.જી.પટેલ સાથે આદિપુર પોલીસનો સ્ટાફ જોડાયો હતો.